Roedd Science Aglow yng Nghanolfan Darwin, Coleg Sir Benfro yn gyfle i arddangos gwahanol sefydliadau STEM sy’n gweithio yn yr ardal ac amlygu’r llwybrau gyrfa posibl sydd ar gael. Ffocws y diwrnod oedd Ynni. Rhoddodd y digwyddiad gyfle i ddisgyblion cynradd weithio ar eu prosiect eu hunain yn yr ysgol a chyflwyno eu gwaith i banel o wahoddedigion, cymryd rhan mewn carwsél o weithdai a ddarparwyd gan Lysgenhadon STEM o ddiwydiant lleol a mynychu sioe. Cyflwynodd y Sefydliad Brenhinol sioe ‘We’ve got the Power’ i ddisgyblion ac yna DPP i athrawon ar sgiliau cyflwyno gwyddoniaeth a Sioe Gymunedol i deuluoedd o’r ardal leol.
Mynychodd dros 130 o ddisgyblion o Ysgol Gynradd Gymunedol Fenton, Ysgol Gynradd Llandyfái, Ysgol Gynradd Johnston ac Ysgol Gynradd Gatholig Mair Ddihalog y digwyddiad, gan ddod ag ymchwiliad gwyddoniaeth gyda nhw i’w gyflwyno i dîm Darwin i ddatblygu eu sgiliau cyfathrebu gwyddoniaeth.
Cymerodd y disgyblion ran mewn carwsél o weithdai STEM, a gyflwynwyd gan Lysgenhadon STEM:

• Timothy Brew - Fforwm Arfordirol Sir Benfro
• Magnus Harrold a Michelle Hitches – Catapwlt Ynni Adnewyddadwy ar y Môr (ORE).
• Rebecca Laye - Cydlynydd Addysg Cymdeithas Frenhinol Cemeg yng Nghymru

Cyflwynodd yr holl ddisgyblion eu hymchwiliad ynni adnewyddadwy i banel er mwyn amlygu’r gwaith a wnaed yn ystod y tymor yn yr ysgol.
Daeth y digwyddiad i ddisgyblion i ben gyda sioe addysgiadol a hwyliog, sioe ‘We’ve got the Power’ gan Usmaa Choudry, Y Sefydliad Brenhinol - Gwyddoniaeth mewn Ysgolion.

Dywedodd Samantha Williams, rheolwraig Dragon LNG Canolfan Darwin: “Cymerodd dros 100 o ddisgyblion ran yn Science Aglow a chawsom ein syfrdanu gan ansawdd eu hymchwiliadau gwyddonol a’u sgiliau cyflwyno.
“Fe wnaeth pawb fwynhau’r diwrnod yn fawr ac rydym mor ddiolchgar i bob un o’r sefydliadau gwych hyn am ysbrydoli’r genhedlaeth nesaf o wyddonwyr.”

Dilynwyd y digwyddiad i ysgolion gan sesiwn DPP y Sefydliad Brenhinol ar gyfer athrawon cynradd ac uwchradd. Nid oes gan bawb sy'n dysgu gwyddoniaeth gefndir mewn gwyddoniaeth eu hunain. Gall sesiwn DPP gyda chyflwynydd proffesiynol helpu i feithrin sgiliau a hyder i ysbrydoli plant gyda gwyddoniaeth ymarferol mewn ffyrdd diddorol a syml. Anogwyd yr holl fynychwyr i rwydweithio a rhannu arfer da gyda'i gilydd.

Fe wnaeth y sioe gymunedol – ‘Rockets’, unwaith eto gan y Sefydliad Brenhinol, danio diddordeb mewn gwyddoniaeth mewn pobl o bob oed, trwy gymysgedd o sgyrsiau, arddangosiadau ac arbrofion rhyngweithiol.

Cydlynwyd digwyddiad Science Aglow gan Gweld Gwyddoniaeth ar y cyd â’r ASE a Chanolfan Darwin. Cysylltwch â cerian.angharad@gweld-gwyddoniaeth.co.uk os hoffai eich ysgol fod yn rhan o drefnu digwyddiad tebyg i ymgysylltu â Llysgenhadon STEM yn eich ardal.
 

Cynhaliwyd Eisteddfod Genedalethol 2023 ym Moduan ym Mhen Llyn rhwng y 5ed a'r 12fed o Awst. Roedd amryw o Lysgenhadon STEM yno ar wahanol stondinau yn ymgysylltu ag ymwelwyr o bob oed. 

Mae'r darn canlynol gan Dr Victoria Bradley o'r Sefydliad Gwyddoniaeth Biofeddygol:
Yn cael ei chynnal mewn lleoliad gwahanol yng Nghymru yn ystod wythnos gyntaf mis Awst bob blwyddyn, yr Eisteddfod Genedlaethol yw’r wyl ddiwylliannol fwyaf Ewrop ac mae’n dathlu diwylliant ac iaith Cymru. Mae’r Eisteddfod yn denu 150,000 o ymwelwyr dros yr wythnos gyda llawer o ddigwyddiadau a gweithgareddau i’r teulu cyfan. 

Er bod Cymru efallai’n adnabyddus fel Gwlad y Gân, mae cyfraniad ymchwilwyr Cymreig i’r byd gwyddonol yr un mor rhyfeddol, ac yn dod yn rhan gynyddol o’r Eisteddfod. 

Eleni, cymerodd Bwrdd Iechyd Prifysgol Betsi Cadwaladr (BIPBC) y cyfrifoldeb i gynnal stondin ym mhentref Gwyddoniaeth a Thechnoleg yr Eisteddfod.

Trefnwyd y stondin ar y cyd gan Dr Victoria Bradley (aelod o Gyngor IBMS o Brifysgol Metropolitan Caerdydd) a Luke Hughes (Pennaeth Addysg a Datblygiad Patholeg, BIPBC), i gydnabod y gwaith a wneir gan wyddonwyr biofeddygol a gwyddonwyr gofal iechyd eraill – gan gynnwys y rhai sy’n gweithio ym maes patholeg.

Manteisiodd ymwelwyr ar y cyfle i ofyn cwestiynau ynglŷn â sut mae samplau’n cael eu prosesu mewn labordai, ac ehangder y dadansoddi y gall gwyddonwyr biofeddygol ei wneud. Roedd llawer wedi'u swyno i ddarganfod pa mor bwysig yw canlyniadau profion labordy i unrhyw broses ddiagnostig ac i'r ddarpariaeth o feddyginiaeth bersonol.

Roedd ein haelodau hefyd yn gallu trafod gyrfaoedd gyda myfyrwyr ysgol ar draws grwpiau oedran amrywiol. Gyda myfyrwyr lefel A tynnodd yr aelodau sylw at bwysigrwydd graddau gwyddoniaeth fiofeddygol Achrededig IBMS ac esbonio'r cyfleoedd prentisiaeth sydd ar gael mewn patholeg hefyd. Ar gyfer plant iau, roedd yr aelodau'n gallu defnyddio'r fersiwn Gymraeg newydd o'n comics Superlab i ennyn diddordeb plant mewn sgyrsiau yn ymwneud â gwyddoniaeth.

Cawsom y sylwadau canlynol gan Lysgennad STEM arall oedd yn gweithio ar stondin wahanol:
"Croesawyd y gweithgareddau STEM gan bawb y bûm yn rhyngweithio â nhw ac roedd yn ymddangos bod ein presenoldeb yn cael ei werthfawrogi’n fawr gan y gymuned leol.

Un o’r prif fanteision oedd cyrraedd pobl ifanc na fyddai fel arfer yn cael y cyfle i gymryd rhan mewn gweithgareddau STEM yn yr ardal hynod wledig hon. Yn gyson roedd plant, yn enwedig cyfran uchel o ferched 3 i 11 oed, naill ai'n llusgo eu rhieni neu'n dod ar eu pennau eu hunain i'r stondin er mwyn iddynt allu cymryd rhan. Roeddent yn amlwg yn frwd dros STEM ac roedd eu llwyddiannau gyda'n gweithgareddau yn cefnogi ac yn atgyfnerthu eu hawydd i ymwneud â STEM yn eu bywydau. I lawer o’r bobl ifanc hyn roedd y digwyddiad yn gyfle prin iddynt ryngweithio â STEM ac roedd y brwdfrydedd a ddangoswyd yn amlygu’r angen i gyrraedd y ddemograffeg hon. Ar lefel bersonol, roedd hyn yn werth chweil."

Mae Llysgenhadon STEM ar gael trwy'r flwyddyn i ymweld ag ysgolion. Os am fwy o wybodaeth ar sut y gallwch chi wneud cais am Lysgennad STEM i ymweld â'ch ysgol chi, cysylltwch â  cenhadon@gweld-gwyddoniaeth.co.uk.

Llongyfarchiadau i Matt Howells o Ysgol Y Graig, Merthyr Tudful ar dderbyn Gwobr STEM Learning Rhagoriaeth mewn addysgu STEM – Cynradd, ac am rannu ei brofiadau gyda ni.

Fel rhan o fy rôl fel Cydlynydd STEM yn Ysgol Gynradd y Graig, rwyf bob amser wedi anelu at wella ein darpariaeth, profiadau a chyfleoedd STEM ar gyfer ein disgyblion. Mae hyn wedi'i sefydlu trwy greu cysylltiadau â diwydiant a darparu profiadau bywyd go iawn trwy ymweliadau safle a gwahodd siaradwyr gwadd sy'n gweithio mewn amrywiol broffesiynau STEM, yn ogystal â chreu cysylltiadau â sefydliadau STEM sydd wedi cynnal gweithdai a sicrhau grantiau cyllid i wella ein hadnoddau STEM o fewn yr ysgol.

Yn ystod haf 2022, bûm yn ddigon ffodus i ennill y wobr ‘Rhagoriaeth mewn addysgu STEM – Cynradd’ drwy STEM Learning UK yn Efrog. Mae’r wobr hon wedi agor amrywiaeth o gyfleoedd newydd, sydd wedi fy ngalluogi i wella ymhellach y ddarpariaeth STEM yn Ysgol y Graig. Mae’r rhain yn cynnwys creu cysylltiadau agosach gydag ystod ehangach o gwmnïau diwydiant sydd wedi gweithio gyda’n disgyblion, sicrhau cyllid i redeg ystod eang o brosiectau o fewn yr ysgol a’n clwstwr o ysgolion, yn ogystal â chael gwahoddiad i fynychu a bod yn siaradwr gwadd mewn nifer o gynadleddau sy'n canolbwyntio ar STEM.

Yn ystod tymor yr haf 2023, cefais wahoddiad i fynychu a bod yn siaradwr gwadd yng Nghynhadledd Rhwydwaith Athrawon Engage Cymdeithas Wyddoniaeth Prydain. Roedd ffocws y gynhadledd yn edrych ar ddull trawsgwricwlaidd o gyflwyno STEM a gwahoddwyd siaradwyr gwadd i gyflwyno astudiaethau achos o sut y maent wedi mynd ati i wneud hyn yn eu hysgolion eu hunain, er mwyn hyrwyddo a gwella’r ddarpariaeth STEM. Yn ystod y gynhadledd cyflwynais ddwy astudiaeth achos o brosiectau sydd wedi cael eu cynnal yn yr ysgol. Braf oedd cael adborth gan athrawon a fynychodd y gynhadledd a hefyd ateb eu cwestiynau, er mwyn cefnogi’r gwaith y maent yn ei wneud yn eu hysgolion eu hunain. Hefyd, tra'n cael y cyfle i wrando ar y siaradwyr gwadd eraill, rhoddodd rai syniadau gwych i mi am brosiectau yn y dyfodol y gallaf gynllunio i'w cyflawni yn fy ysgol fy hun.

Roedd y gynhadledd yn brofiad buddiol iawn, o ran dathlu’r gwaith sydd wedi’i wneud yn Ysgol y Graig a chael adborth gwych, ond hefyd cael eu hysbrydoli gan ymarferwyr eraill am y prosiectau gwych y maent wedi’u cyflawni yn eu hysgolion eu hunain. Mae gan y BSA lawer o gynadleddau y gall ymarferwyr gofrestru arnynt a mynychu o bell, felly byddwn yn bendant yn cynghori eraill i fanteisio ar y cyfle hwn o DPP a chael syniadau newydd ar sut y gallant wella'r ddarpariaeth STEM yn eu hysgolion eu hunain.

Matthew Howells – Cydlynydd STEM, Ysgol Gynradd y Graig, Merthyr Tudful.
mhowells@ysgol-y-graig.merthyr.sch.uk
 

BBC micro:bits AM DDIM i ysgolion cynradd

Cofrestrwch gyda'r BBC i gael set o 30 micro:bit i'ch ysgol gynradd.

Cyfrifiadur maint poced sy’n cael ei ddefnyddio i ddysgu plant oed cynradd am godio yw’r BBC micro:bit ac mae adnoddau ar gael yn y Gymraeg.

Gwyliwch ein fideo isod i ddysgu mwy amdano, ac yna cofiwch gofrestru i dderbyn pecyn o 30 micro:bit am ddim i’ch ysgol chi.

Manylion a chofrestru yma.

Datrys materion caynaliadwyedd gyda gwyddoniaeth. Dydd Mawrth Medi 12fed, 4pm-4.45pm. Ar-lein

Sesiwn Y Gymdeithas Gemeg Frenhinol i athrawon Cynradd.

Ymunwch â ni ar gyfer y sesiwn ryngweithiol hon sy'n archwilio sut y gallwch ddod â materion cynaliadwyedd i'ch ystafell ddosbarth. Byddwn yn archwilio ein hadnoddau newid hinsawdd a ffyrdd o ddefnyddio gwaith ymarferol i wella dealltwriaeth eich dysgwyr. Byddwch yn cael cyfle i drafod cyd-destunau lleol a chenedlaethol y gellid eu defnyddio i amlygu pwysigrwydd gwyddoniaeth wrth ddatrys materion newid hinsawdd. 

Manylion a bwcio yma.

Gweithgareddau STEM Calan Gaeaf. Dydd Iau 5 Hydref. 12.30 - 1.15pm. Ar-lein

Os na allwch ymuno â'r sesiwn hon yn fyw, gwnewch yn siŵr eich bod yn cofrestru ar Eventbrite a byddwch yn derbyn recordiad o'r sesiwn.

Calan Gaeaf yw'r esgus perffaith ar gyfer ychydig o hwyl STEM-taciwlar Arswydus!

Ymunwch â ni am syniadau gweithgaredd gwych sy’n ddelfrydol i athrawon eu dangos yn yr ysgol cyn hanner tymor a disgyblion i roi cynnig arnynt gartref ar y diwrnod mawr, neu i Lysgenhadon STEM gynnal sesiwn hanner tymor gyda grŵp cymunedol. Bydd pob gweithgaredd yn defnyddio cynhwysion cost isel sydd yn hawdd i’w cael .

Cofrestrwch yma.

'Books as hooks'. Dydd Llun 16 Hydref – Dydd Iau 19 Hydref, 4pm-4:30pm. Ar-lein

Sesiwn Y Gymdeithas Gemeg Frenhinol i athrawon Cynradd.

Ymunwch â ni am bedair sesiwn fyw a rhyngweithiol ar sut i ddod â gwyddoniaeth ymarferol i'ch ystafell ddosbarth trwy gysylltu llyfrau poblogaidd â gweithgareddau ac ymchwiliadau i ddangos sut y gallant ennyn diddordeb a bwydo chwilfrydedd eich dysgwyr. Byddwch yn gallu darganfod sut y gellir cysylltu’r gweithgareddau ymarferol â'r Cwricwlwm i Gymru. 

Manylion a bwcio yma.

Sesiwn wybodaeth CREST Darganfod i athrawon a Llysgenhadon STEM yn y GYMRAEG. Dydd Mawrth 24 Hydref. 12.30 - 1.15pm. Ar-lein

Os na allwch ymuno â'r sesiwn hon yn fyw, gwnewch yn siŵr eich bod yn cofrestru ar Eventbrite a byddwch yn derbyn recordiad o'r sesiwn.

Bydd yr un sesiwn yn y Saesneg dydd Llun 23 Hydref, 12.30 - 1.15pm.

Mae Gwobrau Darganfod CREST yn cynnig cyflwyniad i waith prosiect go iawn mewn STEM ac yn rhoi rhyddid i fyfyrwyr rhwng 10 a 14 oed redeg eu hymchwiliadau eu hunain. Perffaith ar gyfer Cwricwlwm i Gymru! Gellir eu cwblhau mewn un diwrnod, neu dros nifer o wersi neu sesiynau Clwb STEM, gyda myfyrwyr yn gweithio gyda'i gilydd mewn grwpiau hunanreoledig. Ar ddiwedd y prosiect mae pob myfyriwr yn ennill Gwobr Darganfod CREST ac mae'r rhain AM DDIM yng Nghymru.

Yn ystod y sesiwn hon byddwn yn dangos un o’r adnoddau Darganfod CREST sydd ar gael i’w lawrlwytho - Datrysiadau Cynaliadwy - gweithgaredd lle caiff myfyrwyr eu herio i ddefnyddio offer digidol a thechnolegau newydd i fynd i'r afael â newid hinsawdd yn eu hardal leol.

Mae gweithgareddau CREST yn rhoi cyfle gwych i Lysgenhadon STEM ymgysylltu ag ysgolion gan eu bod i gyd yn seiliedig ar heriau’r byd go iawn.

Cofrestrwch yma am y sesiwn Gymraeg.

Cofrestrwch yma am y sesiwn Saesneg.

'Space for Everyone'. Medi 14 - 18. Sgwar y Frenhines, Wrecsam

Mae taith roced Asiantaeth Ofod y DU, “Space for Everyone”, yn glanio yn Wrecsam, yn Sgwâr y Frenhines, 14 - 18 Medi!

Mae’r digwyddiad yn Rhaglen Allgymorth STEAM gyda chenhadaeth i ysbrydoli’r genhedlaeth nesaf i ddilyn gyrfaoedd yn niwydiant gofod y DU, yn enwedig rhai o grwpiau heb gynrychiolaeth ddigonol. Does dim angen tocynnau, dewch draw! Bydd y digwyddiad yn cynnwys: 

• Replica anferth 72 troedfedd o roced LauncherOne 
• Profiadau rhith-realiti 
• Cyngor gyrfaoedd gan weithwyr proffesiynol gofod lleol 
• Gweithgareddau sy'n ymwneud â'r gofod 

Teithiau Grŵp - Argymhellir yn gryf eich bod yn ymweld â'r digwyddiad fel grŵp a mwynhau taith bersonol o amgylch y digwyddiad gydag un o'n gwesteiwyr ymroddedig. Lleiafswm o 10 o bobl fesul taith. I archebu slot amser taith grŵp e-bostiwch hello@ha-lo.co.uk gyda dyddiad/amser dewisol. 

Manylion yma.

Cystadleuaeth Ysgolion 2024 Starpack

Cofrestrwch nawr ar gyfer y Gystadleuaeth Ysgolion Starpack newydd ar gyfer disgyblion 9 i 17 oed. Mae’r gystadleuaeth wedi’i dylunio i gysylltu â’r cwricwlwm a’i gefnogi, yn enwedig Dylunio a Thechnoleg, ac annog pobl ifanc i ystyried y rôl bwysig a chwaraeir gan becynnu wrth ddiogelu’r cynhyrchion rydym yn eu cymryd yn ganiataol.

Mae tri briff ar gyfer ysgolion uwchradd gyda chategorïau ar wahân ar gyfer blynyddoedd 7 ac 8, 9 a 10 a blwyddyn 12: 

• Briff dylunio cynnyrch 
• Briff dadansoddi cynnyrch 
• Briff ymchwil pecynnu

Yn ogystal, rydym wedi lansio briff ar gyfer CA2 sy'n canolbwyntio ar ailgylchu deunydd pacio ac adnabod deunyddiau pecynnu. Mae’r briffiau i gyd wedi’u cynllunio yn y fath fodd fel y gallant gael eu hymgorffori yn eich cynllun gwaith ar gyfer cyflwyno gwersi, neu gellir eu cynnal fel gweithgaredd allgyrsiol fel clwb STEM neu Ddiwrnod STEM. 

Mae cofrestru yn agor yn gynnar ym mis Mehefin ac mae pecyn o arweiniad a chymorth ar gael ar gyfer pob briff. Mae’r gystadleuaeth am ddim, ac mae gwobrau gwych ar gael i’r disgyblion buddugol. Dyddiad cau ar gyfer cyflwyno gwaith Gorffennaf 26ain 2024.

Manylion a chofrestru yma.

Gêm y Rhywogaeth Arbennig (The Special Species Game)

Creuwch eich Rhywogaethau Arbennig eich hun a'u hanfon i mewn!

Mae gan bob rhywogaeth ei henw gwyddonol unigryw ei hun sy'n cael ei ddewis gan yr unigolyn neu'r tîm sy'n ei ddarganfod. Mae'r enw fel arfer yn adlewyrchu rhywbeth am y rhywogaeth ei hun. 

Lluniodd Carl Linnaeus y system enwi 'binomaidd', sy'n golygu dau enw. Mae pob rhywogaeth yn cael ei hadnabod wrth ddau enw - Homo sapiens (sy'n golygu meddwl dynol, neu ddoeth) ydyn ni. 

Gallwch chi feddwl am eich Rhywogaeth Arbennig eich hun trwy gyfuno gwahanol eiriau Lladin neu Groeg a dychmygu sut olwg fyddai ar y rhywogaeth a pham y gallai'r rhywogaeth fod wedi datblygu'r nodweddion hynny trwy esblygiad. 

Mae tair prif ffordd o greu eich Rhywogaeth Arbennig eich hun: 

1. Defnyddiwch ein Cynhyrchwyr Rhywogaethau Arbennig ar-lein 
2. Lawrlwythwch ac argraffwch ein gêm gardiau rhywogaeth arbennig 
3. Defnyddiwch bŵer eich dychymyg (efallai gyda rhywfaint o arweiniad o'n rhestrau geiriau) 

Byddwn yn amlygu gweithiau gwych wrth i ni eu derbyn. Dyfernir enillwyr bob blwyddyn ym mis Ebrill, Gorffennaf, Medi a Rhagfyr. 

Manylion yma.

Her Codio'r DVLA

Mae Her Codio'r DVLA yn galluogi myfyrwyr o bob oed i ddatblygu eu sgiliau datrys problemau, gwaith tîm a gwella eu gwybodaeth am raglennu cyfrifiadurol mewn ffordd hwyliog ac arloesol a hefyd i ennill miloedd o bunnoedd o Offer TG ar gyfer eu hysgolion neu Grwpiau.

Mae pob ysgol, clwb a grŵp sy'n gweithio gyda phlant 16 oed neu iau sydd wedi'u lleoli yng Nghymru yn gymwys i gymryd rhan yn y Gystadleuaeth. 

Gall pob ysgol, grŵp neu glwb gofrestru cymaint o dimau ag y dymunir. Rhaid i bob tîm gynnwys lleiafswm o ddau ac uchafswm o chwe phlentyn. 

Mae yna ddewis eang o themâu a gall timau ddewis un neu fwy ohonnynt ond dim ond un cais y gallant ei gyflwyno fesul thema. 

Dyddiad cau dydd Gwener 6 Hydref. 

Yr holl fanylion yma.

FIRST LEGO League 2023-2024

Mae tymor 2023-24 FIRST LEGO League MASTERPIECE wedi cychwyn! Mae’r tymor hwn yn ymwneud â rhoi’r Gelf i mewn i ‘STEAM’, gyda thimau’n dychmygu ac arloesi ffyrdd newydd o greu a chyfathrebu celf ar draws y byd. Rydym yn gyffrous iawn i weld yr holl syniadau anhygoel a chreadigol y gwyddom a fydd yn cael eu cynhyrchu y tymor hwn.

Gall ysgolion wneud cais am Becynnau Ariannu FIRST LEGO League. 

Mwy o wybodaeth yma.

Cynllun Grant Gwyddoniaeth Ymddiriedolaeth Edina

ARDALOEDD NEWYDD AR GYFER BLWYDDYN YSGOL 2023-24 - siroedd Dinbych, Casnewydd a Torfaen

Mae Ymddiriedolaeth Edina yn cynnig grantiau gwyddoniaeth ysgolion cynradd o £700 a grantiau gwyddoniaeth blynyddoedd cynnar o £500. Mae grantiau ar gael mewn awdurdod leol am dair  mlynedd, cyn symud ymlaen i ardaloedd newydd. 

Mae'n syml iawn i'w gael gan bod y grantiau yn anghystadleuol, sy'n golygu eich bod yn sicr o gael arian os ydych yn un o'r ardaloedd cyfredol.  

Gall ysgolion ddefnyddio'r arian ar gyfer:

• Wythnosau gwyddoniaeth ysgol
• Ymweliadau gwyddonol gan gynnwys teithiau allan o, neu ymweliadau i’r ysgol
• Gwella tiroedd yr ysgol ar gyfer gwyddoniaeth
• Offer garddio 
• Tanysgrifiadau gwyddoniaeth

Mae manylion y broses ymgeisio syml yma.

Gall cyfranogiad Llysgennad STEM ennyn diddordeb myfyrwyr ac athrawon fel ei gilydd. Os oes gennych ddiddordeb mewn gofyn i Lysgennad STEM i helpu gallwch wneud eich cais yma. Rydym wedi creu canllawiau byr i annog Llysgenhadon STEM ac addysgwyr i ddefnyddio’r hunanwasanaeth.